Text und Musik: Rolly Brings

Dat wor Musik en uns Ohre,
wat domols he om Nümaat klung:
Et kölsche Volk - samp Bürjer, Bore -
mem Franzmann "Marseillaise" sung.

All frei un jlich un bröderlich
öm fremde Freiheitsbaum jedanz -
em Oktober (17) veerunnüngzich:
Mer ahnte nit dä Ratteschwanz.

Us Befreier woote Häre.
Napolijum wood Kaiser jar.
Statt uns Freiheit ze jewähre,
schlepp' hä uns fott - jäje d'r Zar.

Die Grande Armée em Ies zerbroch.
Befreiungskreech en Dütschland brannt'.
D'r dütsche Adel uns versproch:
Verfassung un en einich Land.
Kölle dät de Häre dusche.
Kosake rette en en Düx.
Mer moote vör dä Preuße kusche.
Jekämpf för nix un widder nix.

Uns "Freie Reichsstadt" wor passé -
allt 1814 wor dat klor.
Dat Preuße-Pack, dat blev wal he
durch Wiener Klüngel em fuffzehner Johr.

D'r Preuße-Stivvel trot hat zo.
En Festung wood uns schöne Stadt.
Nix Freiheit - nor Kasäne-Rauh.
De Reakzijon wood stark un satt.

Dütschland es ne Flecketeppich.
Us üvver dressich Staate holt
die Allijanz sich - janit hellich -
Maach; verbeet uns Schwatz-Rut-Jold.

Ehr Häre: Nix es verjesse.

Die Freiheitsflamm wood ungerdröck
met Flinte, Kerker un Zensur.
Doch es dä Funke nie versteck.
Selvs "Karlsbad" maat uns hat un stur.

Als (18) einunzwanzich Kunde jing,
dat Bonaparte jestorve wor,
wood uns klor, dat hä am Rhing
nit schlächter als die Preuße wor.

Die Allijanz met Tücke, Liste,
met Blot heelt sei et Zickrad an;
zermalmp en Rußland Dekabriste:
"Verfassung" stund op dere Fahn.

Doch en Paris, em Juli (18) dreßich,
als Künning Karl (X) et Räch nit aach,
wood et Pariser Volk schön bessich:
Stund op un hät in fottjejaach.

En Splitterdütschland Patrijote,
ob liberal, ob radikal,
met Freud dat "Juli-Leedche" hote:
Freiheit wor nit nor nazjonal.

Un als vun Sachse bes Kurhesse
et ärme Volk us Nut opstund,
met Rof noh Räch un Brut ze esse,
jing mänch jekrönte Aasch op Jrund.

Dat en d'r Schweiz die reformeete
Kantone sich dann han verfaß
un Demokratie krejeete -
dat kom dä Häre nit zopaß.

Zwei Johr späder nor, en England,
han Bürjer Wahlräch durchjesatz.
Zwar nor riche - ävver Dütschland
kannt nix als Demokratehatz.

Ehr Häre: Nix es verjesse.

För uns es Metternich de Peß.
Hä hät uns Freiheit kujoneet;
hät tireck noh'm Hambacher Feß
Preß- un Versammlungsräch kasseet.

Och d'r dütsche Zollverein,
vun Preußens Jnad uns opjepack,
maat uns die dütsche Lösung klein;
wor Katz em Huhezollernsack.

Die dütsche Bourgeoisie wood rich;
wollt Dütschland ungerm Preußethron.
Et Volk sollt schufte, ävver sich
bejnöje met nem Hungerlohn.

Dat wör dä Häre räch jewäs -
doch wood dat fiese Spill entdeck.
Met "Fridde dä Hötte - Kreech dä Paläß"
hät Büchners Schorsch se ärch verschreck.

Heine, Börne schrevve bessich:
Samp Gutzkow, Laube zensureet.
Reuters Fritz dann, sechsundreßich,
wood op d'r Festung enhafteet.

Als Ähnz Aujuß vun Joddes Jnad
em Staat et Jrundjesetz jekipp,
han sibbe Lehrer "Nä!" jesaat.
Die Jöttinger Sibbe woote jewipp.

En England stredde die Chartiste
öm Wahlräch för d'r Arbeidsmann.
Soldateska, Poliziste
reechte mänch e Blotbad an.

Aachzehnhundertdreiunveezich
- et Dütsche Reich wood dausend Johr
- han Turner, Sänger (janz schön lestich)
de Zukunf jefiert - nit dat, wat wor.

Ehr Häre: Nix es verjesse.

En Schlesije drev Hungersnut
die Weberslück zom Opstand an.
Ehr Kinder wimmerte noh Brut.
Maschinestürmerei fing an.

Dä Opstand wood en Blot ersteck.
Dann kom dä Förüvverfall
en Leipzig op die Bürjerslück:
Massaker. Oprohr. Üvverall.

En Weßgalizije brannte Bore
veerhundert Häresetze af.
Kunnt och nit mih lang dann dore:
Die Allijanz föhlt' Polens Kraff.

Die Krakow-Freiheitskämpfer wore
Helde uns - trotz Nidderlaach.
"Noch es Pole nit verlore!"
Dä Freiheitskampf maat Dütschland waach.

Die Allijanz steit an d'r Wand.
Dat Metternich-System es baff.
Frankreich, Pole, Schweiz un Dütschland
zeije Mot un Kampfeskraff.

Nit verjesse: À la Bastille!
Nit verjesse: Ca ira!
Nit verjesse: La Marseillaise!
Nit verjesse: La tyrannie - à bas!

Republik un einich Dütschland.
Freie Wahle. Arbeit. Brut.
Freiheit. Jlichheit. Hand en Hand.
Nie mih Sklav sin - leever dut.

Dä dat verzallt, weed langsam alt;
setz voll met Narve möd em Huus.
Paßt op, ehr Häre, morje allt
fechte uns Pänz et besser us.

Ehr Häre: Nix es verjesse.
(September 1997)